မန္တလေးတိုင်းဒေသကြီး၊ စဉ့်ကူးမြို့နယ်၊ ရှောက်ပင်ရိုးအုပ်စုရှိ သစ်တော ပလပ်မြေ ဧက ၅၀.၈၅ တွင် ရွှေသတ္တုတူးဖော်ရေး ကုမ္ပဏီနှင့် ဒေသခံပြည်သူများအကြား မြေယာအလွဲသုံးပြဿနာ ဖြစ်ပွားလျက်ရှိသည်။
ငါးပြားပေးကျေးရွာတည်ရှိရာ အဆိုပါမြေနေရာ၌ ရွှေလုပ်ကွက်အဖြစ် လုပ်ကိုင်နေကြသော ငါးပြားပေးလုပ်ကွက်မှာ သစ်တောဦးစီးဋ္ဌာနမှ ၅၀.၈၅ ဧကရှိသည့် မြေကွက်အား ပလပ်မြေအဖြစ် သတ်မှတ်ပေးထားကြောင်း ဒေသခံပြည်သူ များထံက သိရှိရသည်။
`ပလပ်မြေဆိုရင်တော့ ရွှေလုပ်ကွက်လည်း လုပ်ခွင့်မရှိဘူး၊ လူနေခွင့်လည်း မရှိပါဘူး၊ အများပိုင်မြေအဖြစ် မိုးတွင်း ကာလမှာ ရေ၀ပ်တွင်းအဖြစ် ထားပေးတာပဲ ဖြစ်တယ်`ဟု အမည်မဖော်လိုသူ သတ္တုတွင်းအင်ဂျင်နီယာ တစ်ဦးက ပြောသည်။
အဆိုပါသစ်တောပလပ်မြေတွင် ပြည်သာနိုင်ကုမ္ပဏီ၊ ထက်ရည်လင်းကုမ္ပဏီ၊ future၊ ရွှေပေါက်ပေါက်နှင့် အောင်ကိုသူ ကုမ္ပဏီများက ဒေသခံအင်းလုပ်ငန်းရှင်များနှင့် အကျိုးတူရွှေတူးဖော်ရေးလုပ်ငန်းများ လုပ်ကိုင်လျက်ရှိကြောင်း သိရှိရ သည်။ အစိုးရထံ ရွှေတူးဖော်ခွင့် လေလံအောင်ထားပြီးသား ကုမ္ပဏီများနှင့် ဒေသခံငွေကြေးတတ်နိုင်သူတို့က အင်းပိုင်ရှင် အဖြစ် အကျိုးတူ ရွှေတူးဖော်နေကြခြင်းဖြစ်သည်။
ငါးပြားပေးလုပ်ကွက်ကို လေလံအောင်ရရှိထားသည့်ကုမ္ပဏီများမှ ပြည်သာနိုင် ကုမ္ပဏီမှာ ရွှေလုပ်ကွက် ရရှိထားပြီး လေလံအောင် ဧက ၄၀၊ လုပ်ကွက် ၂ ကွက် လုပ်ပိုင်ခွင့်ရရှိခဲ့ကြောင်း၊ အင်းပေါင်း ၈၀ ၀န်းကျင်တွင် အင်းပိုင်ရှင်ပေါင်း ၅၀ ၀န်းကျင်ခန့်နှင့် အကျိုးတူတွဲဖက်လုပ်ကိုင်နေရခြင်းဖြစ်ပြီး ၊ ဒေသခံပြည်သူများနှင့် မြေယာပြဿနာဖြစ်ပွားနေသည့် သတ္တုတူးဖော်ရေး ကုမ္ပဏီဖြစ်သည်။
ပြည်သာနိုင် ကုမ္ပဏီအနေဖြင့် ငါးပြားပေးရွာလုပ်ကွက်လုပ်ကိုင်ခွင့်မှ နိုင်ငံတော်သို့ တစ်နှစ်လျှင် ရွှေစင်( ၂၄) ကျပ်သား ပေးဆောင်ရန် သဘောတူညီမှုရရှိထားကြောင်း လေလံကာလမှာ ၂၀၁၁ခုနှစ် ဖေဖော်ဝါရီလမှ စတင်ကာ (၃)နှစ် လေလံ အောင်ခဲ့သည့် ကုမ္ပဏီလည်းဖြစ်သည်။
အဆိုပါဒေသ၌ ရွှေသတ္တုတူးဖော်ရေးလုပ်ငန်းများတွင် ပြဒါးနှင့်ဖမ်း၍ ရွှေတူးသန့်စင်ခြင်း၊ ဆိုက်ရာနိုက်ဓါတု ပစ္စည်းသုံး၍ ချက်ကန်များမှ ရွှေသန့်စင်ခြင်း အပါအ၀င် နောက်ဆုံးအဆင့်အနေဖြင့် ရွှေထုတ်ပြီးသား အကြွင်းအကျန်စွန့်ပစ်မြေအား ၀ယ်ယူကာ ခဲနှင့်ရွှေကိုပြန်ဆွဲ၍ ငရဲမီးနှင့်စားကာ မီးလင်းရွှေအဖြစ် ထုတ်လုပ်သည့် မိုက်လုပ်ငန်းများလုပ်ကိုင်ကာ ရွှေရှာဖွေလျက်ရှိပြီး မန္တလေးရှိ အောင်သမာဓိ၊ ၀ိန့်စိန်အစရှိသည့် ရွှေဆိုင်ဈေးကွက်သို့ တင်ပို့ရောင်းချလျက်ရှိသည်။
သစ်တောမှ ပလပ်မြေ၊ စားကျက်မြေ၊ မီးတားမြေတို့မှာ ပတ်ဝန်းကျင်နှင့် လူနေမှုဘ၀ အဆင်ပြေစေရန် ရည်ရွယ်ချမှတ် ထားသော မူဝါဒများဖြစ်သောကြောင့် သစ်တောဥပဒေကို လိုက်နာ ထိန်းသိမ်းသင့်ကြောင်း၊ သစ်တောပလပ်မြေ တွင် ရွှေတူးဖော်နေခြင်းကို ခွင့်မပြုသင့်ကြောင်း သတ္တုအင်ဂျင်နီယာက သုံးသပ်ပြောဆိုသည်။
မန္တလေးတိုင်းဒေသကြီး၊ စဉ်ကူးမြို့နယ်အတွင်း ကျေးရွာအုပ်စု(၃၉)အုပ်စုရှိပြီး ရွာပေါင်း(၁၂၀)ကျော်ရှိကာ ရှောက်ပင် ရိုးကျေးရွာ အုပ်စုရှိ ရှောက်ပင်ရိုး၊ ပျဉ်းပင်၊ ကဗြို၊ နွယ်ရုံ၊ ကျည်တောက်ပေါက်၊ ငါးပြားပေးနှင့် ကံတောင်ကျေးရွာများ၌ ရွှေသတ္တုတူးဖော် ရေးလုပ်ငန်းများအား လုပ်ကိုင်လျက်ရှိသည်။
Myitmakha Media Group
No comments :
Post a Comment